Na-Buite
Die hart van Kerksondermure is om die Jesuslewe te ontdek. Dit beteken veral om met vrymoedigheid vir behoeftiges te sorg, hulle toe te rus, aan te moedig en op te hef.
Met ander woorde, om hulle lief te hê.
Ons wil dit eenvoudig vir jou maak om Na-Buite te leef saam met Kerksondermure:
‘n Gemeente wat na-binne gerig is, en net vir homself bestaan, verloor die wese van God se bedoeling met die kerk om hoop te bring in ons stad, gemeenskap en vir die nasies . Dit is hoekom ons Na-Buite leef. Kontak na-buite@ksm.co.za om aan te meld of vir meer inligting.
Kwesbare Kinders
Een aspek van ons missie om meer Na-Buite gerig te leef is om ‘n beter toekoms vir kinders te ontsluit deur die gapings in onderwys, voedselsekerheid en gesinsberading in minderbediende gemeenskappe aan te vul.
Kerksondermure is reeds betrokke in die holistiese versorging van 2000 kinders. 120 ontvang ekstra remediërende onderrig deur hulponderwysers wat ons aanstel om die gaping in wiskundige, leesvaardighede en dissipelskap, by graad 3’s aan te spreek. Ons wil dit in die volgende jaar uitbrei na 400 kinders.
Verswakte Bejaardes
Die liefdevolle omgee vir verswakte bejaardes is al vir baie jare ‘n prioriteit vir Kerksondermure. Deur ons programme versorg ons meer as 800 bejaardes met voedselhulp, fisiese gesonheid, maatskaplike dienste en kreatiwiteit sessies op verskillende platforms.
Voedselsekerheid
KSM voed reeds gemiddeld 3000 kinders van 50 kleuterskole in minderbevoorregte gemeenskappe met 42 000 etes. Ons doelwit vir die jaar is om 420 000 etes aan kinders te voorsien wat baie keer net die een maaltyd per dag by die skool ontvang.
Werklose Persone
Kerksondermure verskaf vaardigheids- en entrepreneurskap opleiding aan 300 werklose persone.
Bystand en Berading
1100 lidmate en 1500 nie-lidmate word jaarliks bygestaan met berading en ondersteunings groepe, en 400 persone ontvang jaarliks maatskaplike sorg.
Rampverligting
KSM is waar die nood is. Tesame met verskeie vennote, bied ons humanitêre hulp aan rampslagoffers in S.A. tydens nasionale rampsituasies. Ons het reeds ondersteuning gebied aan Mosambiek tydens ‘n paar vloedrampe. In Kwa-Zulu Natal ook met die vloedrampe, asook in die Noord – en Oos Kaap met droogtehulp programme. Die groot fokus van ons ondersteuning was op voedselvoorsiening en die herbou en herstel van kerke.
Raak betrokke by Gemeenskapsprogramme
Ons Na-Buite gerigte inisiatiewe fokus op noodverligting, maatskaplike sorg, berading en opvoeding in die gemeenskappe om ons, sowel as humanitêre hulp met rampsituasies in SA. Ons 23 gemeenskapsprogramme strek vanaf Pretoria Oos, Pretoria Wes, Centurion, Olievenhoutbosch, Midrand en Midstream.
BBBEE & 18A vir Besighede
Ter ondersteuning van ons inisiatiewe, bied KSM Broad Based Ownership strukture aan deelnemende organisasies vir BBB-EE vlak verbeterings, CSI punte en 18A belastings vrystellings sertifikate vir donasies. Hierdie dividende en donasies van ons besigheidsgemeenskap stel KSM in staat om ons impak in mense se lewens verder te verhoog.
Bereik die nasies en wees 'n seën deur sending
Elke volgeling van Jesus is geroep om die Goeie Nuus te deel. Jy, net so veel soos ‘n sendeling. Die verskil kom in die waar en in die hoe.
Kerksondermure is ‘n sturende gemeente en ondersteun 8 sendelinge wat in 10 lande werksaam is. Elkeen van hierdie sendelinge benut hulle gawes en talente deur geestelike leieropleiding, dissipelskap toerusting of evangelisasie werk.
Sendelinge voel wel baie keer alleen en leef onder uitdagende omstandighede. Jou belangstelling, gebed en ondersteuning bemoedig elkeen om in vreugde te volhard.
Kontak dien@ksm.co.za as jy meer wil weet oor sending of om in die ondersteuning van ons sendelinge betrokke te raak.
Ondersteun Kerksondermure finansieël
Besighede kan ook bydrae maak tot Kerksondermure se niewinsgewende vennoot, SUS.
100% van alle fondse en voordele gaan direk aan die begunstigdes.
Ontvang ’n 18A-belastingsaftrekkingssertifikaat vir jou besigheid.
BB SEB-voordele is van toepassing op spesifieke projekte.
